Venezuela-in Brazil atangin palai ko kir

Brazil parliament-in an presi-dent Dilma Rousseff-i ni 180 chhung atana a suspend hnuah, Venezuela sorkar chuan Brazil-a an ram palai an dah chu a ko kir.

Venezuela President Nicolas Maduro chuan an ram palai, Alberto Castellar chu President aṭanga Rousseff-i suspend a nih hnuah, an rama haw tura a koh thu a sawi. Rouseff-i hrem a nih dan chu dik lo taka inpaihthlakna a ni tiin, "Brazil rama thil thleng zawng zawng hi America duh dan lo vek a ni" a ti. Rousseff-i paihthlatute chuan regional bloc, Union of South American Nations (Unasur) pawh tihchhiat an tum a ni, a ti.

Kar kalta Ningani khan Brazil parliament upper house, Senate chuan an president Rousseff-i paihthlak anih theih nan a chungthu ngaihtuah a remti a, ni 180 chhung atan president a nihna aṭangin suspend a ni a, vice president Michel Temer chu acting president atan dah nghal a ni. Rousseff-i budgetary law palzuta puh a ni a, thiam loh chantir a nih chuan president aṭang hian paihthlak niin a term hman zawh loh la awm chu Temer hian a hmang tluan thung ang.

Venezuela President chuan an ram chhunga factory, thil siam chhuah lam chawlhsante chu an factory man sakah leh, a neitute pawh jail-a khungah a vau. President Maduro chuan an ramin sum lama harsatna a tawh mekah, an dinhmun siamṭha turin thil siamchhuah lamah ṭan lak an ngai tih a sawi. Venezuela rama ei leh zu lam siamtu company lian ber, Polar Group-in an thil siam chhuah a tihtawp hnuah President hian vauna thu hi a chhakchhuak a ni.

Caracas-a rally neihnaah he thu hi sawiin, Maduro chuan, "Kan thil siamchhuah ṭhin angte siam leh turin theihtawp kan chhuah a ngai a ni" a ti a,thil siamchhuah tihtawp duhte chuan ram chhiatna an duh a ni tiin an ram aṭanga chhuak mai turin a ti bawk. President Maduro hian kumin January thlaa 'economic emergency' a lo puan tawh pawhseiin, kar kalta Zirtawpni khan state of emergency a puang zui bawk a, hei hi thla thum chhung atana hman a nih tur thu a sawi.

Venezuela hi khawvela oil reserve nei lian ber ni mah se, khawvel puma oil man a tlakhniam nasat avangin sum lakluh lamah a nghawng nasa hle. Nikum khan a sum lakluh zat hi 5.7% in a tlahniam a, hetihlai hian an rama thil man sanna chu 180% te a tling thung.

Chaw lam chi, damdawi leh nitin khawsakna atana mamawh hrang hrangte an indaih lo hle a, Maduro chaunehi hi sumdawngte leh US vang niin a puh. Ei tur bakah energy leh tui lam thlengin harsatna an tawk chho tawh a ni.