Canada PM-in Fort McMurray a tlawh

Canada Prime Minister Justin Trudeau chuan ram kangin a mankai avanga khawchhung mipuite an tlanchhuahsan, Fort McMurray khua chu Inrinni khan a tlawh.

Canada rama ramkang nasa tak thlengin Alberta province-a oil sands capital, Fort McMurray khua hi a man kai a, he khuaa cheng mi 88,000 chuang chu hmun him lamah sawnchhuah vek an ni. Kangmei chhuak hian khawchhunga chenna in leh building pawimawh dang 2,432 a kangchhia.

Trudeau chuan Alberta permier Rachel Notley leh emergency worker-te a kawm a, kangmeiin chhiatna a thlen dan hrang hrangte an enkual bawk.

Canada ram kang hian square meter 2,410 zeta zau a tuam a, ziaawm lam pan tawh mah se kar eng emaw zat chu hnuah chuah a mit theih rin a ni.

Official-te chuan Fort McMurray khuaa cheng, hmun him lama tlan-chhuakte hi kar hnih hnuah an khuaa an kir leh theih an beisei thu an sawi. Khua aṭanga tlanchhuak zinga a tam zawk hi sorkarin an awm lailawk tur a siamah an la khawsa a ni.

Chhiatna thlengah PM Trudeau-a chu che muang lutuka puhin eptu lam chuan an sawisel a, Fort McMurray khua pawh a tlawh har lutuk niin an sawi. Sorkar chuan he khuaa chengte chhawmdawlna pek dan tur leh, kangmeiin a tihchhiatte din thar leh dan tur ngaihtuah turin committee a din.