IS-ten Baghdad-a gas plant an bei

Islamic State (IS) firfiakte chuan Pathianni khan Iraq khawpui, Baghdad hmarlama sorkar enkawl gas plant an bei a, mi 11 an that.

Pathianni zing khan firfiakte hian Taji plant luhna gate-ah car bomb an tipuak a, hemi hnu hian firfiak paruk phurtu car chu plant compound chhungah tlan lutin security force-te nen an inkap zui ta a ni. Firfiakte an kahhlum zing≠ah hian police-te pawh an tel a, power station pahnih chu electric an siamte an titawp lailawk tir bawk. Firfiak leh security force-te inbeihnaah hian mi 21 in hliam an tuar a ni.

IS-te hian Taji plant an beih chungchang hi internet lamah an tarlang a, an pawl member pali-te chuan machine gun nen plant hi beiin, guard-te an kaphlum tih an sawi. He plant hi Iraq sipaite chuan headquarters atan an hmang niin an tarlang bawk.

Baghdad Operations Command thupuangtu chuan gas sto≠rage pathumte chu firfiakte hian an hal hman niin a sawi a, mahse a hnuah security force-ten firfiakte hi an kaphllum vek niin a sawi.

Iraq Oil Ministry chuan plant beih hian eirawngbawlna gas leh electricity siamchhuahna kawngah nghawng a nei lo niin a tarlang. Mahse a bul hnaia power station pahnih chuan Taji plant aṭanga gas supply an hmuh loh avangin hna thawh an khaihlak niin a sawi.

IS firfiakte hian Iraq hmar leh khawthlang lam hmun tam tak chu an la thunun a, kar kalta chhung khan firfiakte pawikhawihna thlen avang hian mi 100 vel zet an thi a ni.

Iraq Prime Minister Haider al-Abadi chuan an ramin politics lama buaina a tawh mek chu firfiakte hian remchangah an hmang niin a sawi.