Israel-in Turkey nena free trade agreement siam nuai bo dawn

Israel finance minister Bezalel Smotrich chuan Israel chuan Turkey nena free trade agreement an lo siam tawh chu a nuai bo dawn a, hei bakah Turkey aṭanga bungrua lak luhah chhiah 100% zel a la tawh dawn tih a puang.

Minister hian tun hnaia Turkey president Tayyip Erdogan-a'n Israel-in Gaza Strip a beih duh lohna lantirna atana Israel rama an thil thawn chhuah ṭhin titawp vek tura thutlukna a siam a chhan letna a ni.

Smotrich hian a ruahmanna siam hi cabinet pawmpui turin a theh lut tawh a ni. Kum 1996 khan Israel leh Turkey hian Free Trade Agreement hi an ziak a, kum 2000 khan an inremna siam hi a huang zauhin, industrial goods zawng zawng an huamtir a, hei bakah Turkey aṭanga bungraw lak luha chhiah an lak pawh an titawp a ni. Kum 2007-ah FTA hi zauh belh lehin, agricultural products ho an belh leh a, henga chhiah lak pawh hi tihtawp a ni bawk.

Minister chuan chhiah lakna tur thar a siam chu Turkey president Recep Tayyip Erdogan-a'n thuneihna a chan chhung chuan hman chhunzawm a ni dawn tih a sawi. Hei bakah Israel-in bungrua a lak luhna kawnga Turkey rama a innghahna tihtlem a nih theihna turin, bungraw lak luh dan kawng dang pawh dap an tum.

Israel-a thil siam chhuaktu pawl, Manufacturers Association of Israel chuan thil siam chhuaktute chu Turkey ram aṭanga an thil lak luh ṭhin thlakna atana China, Eastern Europe, Greece, Germany, Cyprus leh Taiwan lamah kawng dap turin an chah.