Armenia leh Azerbaijan-te ramri chungchangah an inrem

Armenia leh Azerbaijan-te chuan hun rei tak an lo inep tawhna ramri chungchangah May 16 khan inremna an neih theih thu an puang.

Armenia leh Azerbaijan foreign minister-te chuan a ruala thuchhuah siamin, ram pahnihte'n an ramri inṭawma border delimitation commission an din ve vete kaltlanga inremna an siam theih thu puangin, ramria an inremna chuan Soviet hunlaia map siam an rin thu an tarlang. Inremnaah chuan Armenia-in a thunun ramri khua pali; Baghanis Ayrum, Ashaghi Askipara, Kheyrimli leh Ghizilhajili te chu Azerbaijan hnenah pek let leh tur a ni a, Armenia-in hun rei tak an thunun Nagorno-Karabakh region nikuma Azerbaijan-in an lak let avanga buaina chhuahna hmun pawh a huam tel a ni.

Armenia prime minister, Nikol Pashinyan chuan cabinet hmaah inremna an nei thei chu lawmawm a tih thu a sawi a, Armenia ram tana mellung pawimawh tak leh an zalenna leh thuneihna tihnghehna a ni, a ti. Pashinyan chuan ramriah hian Armenia chuan kawng thar an siam tur thute sawi bawkin, ram pahnihte chuan ni 10 chhungin ramriah hian border guard an dah ve ve tur thute a sawi tel bawk.