Singapore-ah Covid hri leng thar leh

Singapore-ah Covid-19 hri a leng thar leh a, kar khat chhungin hri kai mi 25,900 chuang hmuh chhuah an ni a, a peak hi June thla laihawl leh tawp lamah a thlen chhoh rin a ni.

Sorkar chuan hri leng thar leh avang hian thuchhuah siamin, mipuite chu face mask hmang ṭha turin a ngen.

Ministry of Health (MOH) chuan May 5 - 11 inkar khan hri kai thar hi mi 25,900 chuang awmin, a hma kara hmuh chhuah mi 13,700 aṭangin 90% dawnin a pung chho tih a sawi. Chawhrualin ni khata hri kai hmuh chhuah thar hi mi 250 vel zel ang an tling.

Ministry chuan uluk takin hri len chhoh dan chu a thlithlai reng tih a sawi a, public hospital-te chu non-urgent surgery case-te titlem a, damdawi-in khumte pawh a ṭul huna hman theih tura lo ruahman turin a chah. Hemi rual hian mipuite chu symptom a nasat viau loh chuan damdawi-in lam pan kher lo a, in lama inenkawl dan ngaihtuah turin a ti bawk.

Health Minister, Ong Ye Kung chuan Covid-19 chu a bo tawh dawn lo a, kumtinin a wave hi vawi khat emaw, vawi hnih emaw chu a thleng zel tawh dawn a ni, a ti. Singpore chu tranport leh communication hub a nih avangin, khawpui dangte aiin he wave hi an tuar hmasa niin a sawi bawk. Hri rawn leng thar leh avang hian sorkar chuan khuahkhirhna leh inkharkhipna lam siam a tum lo a, heng chu a tawpkhawkah chauh lo chuan kalpui a ni dawn lo tih a tarlang.