Myanmar armed group-in Buthidaung khua an la

Myanmar-a rorellai, sipaite nena inbei, armed group Arakan Army (AA) chuan Inrinni liam ta khan Myanmar khawthlang lam, Rakhine state-a khaw pawimawh tak, Buthidaung khua chu sipaite kut aṭanga lain, an thununna hnuaiah a awm tawh tih an sawi.

Nikum November thla aṭang khan Rakhine state-ah AA leh Myanmar sipaite hi an inbei tawh a ni. AA fighter-te hian India leh Bangladesh border-a hmun eng emaw zat chu sipaite kut aṭang hian an laksak tawh a ni.

AA chuan Inrinnni khan a Telegram channel-ah hemi chungchang hi tarlangin, 'Buthidaung-a Myanmar Amry base-te chu kan la vek tawh', an ti a, heng zingah hian 'military strategic headquarters' pawh a tel tih an sawi. An pawl thupuangtu, Khine Thu Kha chuan an fighter-te leh sipaite hi khaw pawn lamah an la inbei chhunzawm reng niin an tarlang bawk. Buthidaung hi Rakhine state khawpui, Sittwe hmar lam km 90 vela hlaa awm a ni.

Hetih lai hian Rohingya activist ṭhenkhat chuan AA hian Buthidaung leh a chhehvel lak tuma an beihnaah Rohingya mite bitum telah an puh a, mi tam tak himna zawngin an tlanchhia a ni, an ti. Free Rohingya Coalition advocacy group co-founder, Nay San Lwin chuan AA fighter-te hian khaw chhunga mi awmte chu an in chhuahsan tura nawr luiin, an inte an halsak niin a sawi. Rohingya-te hi kum 2017-a Myanmar sipaite Rakhine state-a beihpui an thlakna avangin hmun dangah an tlanchhe nasa hle a, tunah hian Bangladesh-a Cox's Bazar-a refugee camp-ah Myanmar aṭanga tlanchhia hi mi maktaduai khat dawn an la awm.