Israel war cabinet minister-in banna thehluhah vau

Israel war cabinet minister Benny Gantz chuan prime minister Benjamin Netanyahu chuan indona a zawh hnuah, Gaza Strip tan ruahmanna felfai a siam lo a nih chuan minister a nihna aṭanga banna thehluhah a vau.

Gantz chuan Gaza Strip tana an thil tih tur paruk, six 'strategic goals' siam turin June 8 thleng hun a pe. Heng ruahmanna siam tura a phut zingah hian Gaza-a Hamas rorelna tihtawp leh, civilian admistration din te a tel. Heng bakah hian Hamas-ten Gaza-a an hren mek, Israel leh ramdangte mite hruai haw vek te, indona avanga Palestinian mi tlanchhiate September 1-a Gaza hmar lama kir tir leh vekte pawh a tel a ni.

'I mimal thil aia ram i dah hmasak chhung chuan, eng ang harsatna pawh beih pui tur chein kan awm zel ang," tiin, hemi rual hian a mimal duh dan ang a kal fawr pui lutuk chuan a kaihhruai sorkar chu bansan lo thei loin midangte a siam dawn a ni, tiin a vaukhan.

Gantz-a'n he thu a sawi chhuah hma hian war cabinet member dang, defence minister Yoav Gallant pawhin PM Netanyahu chu Israel-in Gaza-a civil rorelna emaw, sipai rorelna emaw a kuta lak a tum lo tih mipui hriata puang turin a lo phut tawh bawk. Gallant leh Gantz-te hian an sipaite rorelna hnuaia Gaza dah hi Israel security tan a ṭha lo zawk niin an ngai a, hetih lai hian Netanyahu kaihhruai ṭangrual sorkara tel dangte erawh chuan Hamas-te nuaibo vek tur chuan an sipaite thununna hnuaia dah chu a ṭul niin an ngai thung.

PM Netanyahu hian Gantz-a thil phutte tihhlawhtlin a nih chuan, "Indona hi tawpin Israel chu hnehin a awm ang a, Hamas mi hrente chu ngaihthah zui an ni ang a, Hamas-te chu intuaithar leh turin kan kalsan ang a, Palestinian state a lo ding dawn tihna a ni," a ti.