Capriles-an duhthlanna siam turin sipaite ngen

Venezuela ram eptu hruaitu, Henrique Capriles chuan an rama emergency puan a nih hnuah sipaite chu President Nicolas Maduro nge an ram danpui zawk an thlawp dawn tih duhthlanna siam turin a ti.

President Maduro hian an ram sum dinhmun chhe zel avangin ni 60 chhung atan emergency a puang a, hemi chhung atan hian sipai leh police-te chu thuneihna sang tak pek an ni.

Capriles chuan President thupek siam hian an ram danpuiin a pawm loh thuneihnate a inpe nia sawiin, Venezuela mipuite chu duh lohna lantira nawrh huaihawt turin a sawm. "Maduro hi ram danpui chungah a indah a, hei hi mipuite chuan kan pawm thei lo a ni" a ti.

Sipaite hnenah pawh Maduro nge an thlawp dawn an ram danpui zawk tih thutlukna siam thuai tur≠in Capriles chuan a ti bawk.

President Maduro chu sipai chakna hmanga paihthlak an tum lo tih sawiin, Capriles chuan mipuite duhthlanna hmang ngeia paihthlak a ni zawk dawn a ni, a ti. Eptute hian mipuite ngaihdan lakna tur, referendum buatsaih phut≠in kar hnih kalta khan mi maktaduai 1.85-ten an sign hnanna petition an lo thehlut tawh a ni. An ram danpui chuan petition-ah hian vote nei zinga 20% tal emaw, mi nuai li emaw talin hming an sign chuan president chu thuneihna a la chan chhunzawm zel dawn nge dawn lo chungchangah mipuiten duhthlanna an siam thei dawn niin a tarlang. Mahse sorkar chuan referendum hi kaltlangpui a ni dawn lo tih a sawi.

Hetihlai hian President Maduro chuan amah dodalna chungchangah ramdang an inrawlh niin a sawi. US chuan an rama a sipaite dahlutah puhin, kar kalta khan US sipai thlawhtheihna chu phalna nei loin Venezuela boruak≠ah ṭum hnih an thlawk lut a ni, a ti.