Tanzania-ah thawktu a taka awm lo 10,000 hmuchhuak

Tanzania sorkar chuan an rama eirukna umbo tura a hmalakna kal zelah, hnathawktu lem, a taka hmuh tur awm si lo mi 10,000 chuang a haichhuak tawh.

President John Magfuli chuan kumin March thla khan sorkar hmun hrang hrangte audit turin thupek a lo siam tawh a, heta ṭang hian a taka hmuh tur awm lo, thla tina sorkarin hlawh a lo pek ṭhin hnathawktu mi 10,000 chuang zet an awm tih hriatchhuah a ni ta a ni.

Nikum October thlaa Tanzania President atana thlan tlin a nih khan, Magufuli hian sorkar sum hmanral dante enfiah a, ṭulloa sum hmante tihtawp a tum thu a lo sawi tawh a ni. Tanzania sorkar hian sorkar hnuaia thawk mi 550,000 vel hlawh atan thla tin dollar maktaduai 260 chuang a seng ziah a ni.

Africa ram hrang hrangah hnathawktu lem, a taka hmuh tur awm lo hi an awm fo. February thla khan Nigeria sorkar chuan thla tina hlawh an pek
ṭhin, payroll-a chuang mi 24,000 te chu a taka awm lo an ni tih a hmuchhuak. Kum 2014 September thla khan Kenya sorkar pawhin hetiang hi mi 12,000 an awm tih a lo haichhuak tawh bawk.