Helicopter chesualah Iran President Raisi a thi

Iran president Ebrahim Raisi chu an ram hmarthlang lama Azerbaijan ramri bul, Varzeqan bial tlang rama helicopter chesualah a thi.

Helicopter hi Pathianni zan khan chesualin a tla a, President Raisi bakah foreign minister Hossein Amirabdollahian leh mi dang paruk an chuang. Pathianni zankhuaa an ruang zawn a nih hnuin nimin zing khan an hmu a ni.

Iran ram hotu lu ber, Supreme Leader Ayatollah Ali Khameini chuan President Raisi hi ram pumah ni nga chhung sun a ni dawn tih puangin, Iran mipuite a tawrhpui thu a sawi a, President lailawk atan First Vice President Mohammad Mokhber a ruat nghal bawk. An ram danah chuan President thar tur hi ni 50 chhunga thlan a ngai dawn a ni.

Kum 63 mi, President Raisi hi kum 2021 khan Iran President atan thlan niin, Ayatollah Ali Khamenei nena inpawh tak niin, a thlaktu tur pawha beiseiawm ber a ni. President lailawk atana ruat, Mohammad Mokhber hi kum 68 mi niin, Supreme Leader nena inpawh tak bawk an ni. Kum 2010 khan nuclear/ballistic missile activities-a inhnamhnawiha puha European Union-in a hrek zingah a tel a, mahse, kum hnih hnuah a hrek zing aṭang hian a paih leh thung. Kum 2022 aṭang khan Supreme Leader thurawn petu, parliament leh Iran constitutional watchdog inkar buaina chingfel ṭhintu bakah an ram inthlanpui buaipuitu, Expediency Council member a ni bawk.

President Raisi thih chungchangah hian Iran mipuite'n an dawnsawn dan a inang lo hle. A chuanna helicopter a chesual tih an hriat tirh hian Tehran leh Mashhad main square-ah mi tam tak kal khawmin, a himna turin an ṭawngṭai. Hetih lai hian Iran mi ṭhenkhat erawh chuan President chuanna helicopter chesual chu an lo lawm thung a, halpuah nena lo lawmte pawh an awm. Social media lamah pawh fiamthu thawhna atana hmangin meme-te an tidarh nasa hle. Raisi hi sorkar dodaltute rapbet leh, Iran rama free speech nekcheptu niin an puh a, hmeichhiate thawmhnaw inbel chungchanga khuahkhirhna khauh tak, 'hijab and chastity law' kalpuitu niin, he dan hnuaiah hian morality police-te chu thuneihna sang tak pek an ni. He dan siam hi mi tam takin an dodal a, ram chhunga he dan duh lohna lantirin hun rei tak nawrh pawh huaihawt a lo ni tawh a, President Raisi chungah pawh an lungawi lo hle a ni.