South Africa hruaitu hlui Zuma inthlanah din phal lo

South Africa President lo ni tawh, Jacob Zuma chu tun thlaa an ram parliament inthlan neih turah a din phalsak a nih loh thu court-in a puang.

South Africa counstitutional court chuan Zuma hi kum 2021 khan contempt of court thubuaiah thla 15 jail tang turin a hrem a, hei vang hian inthlana a din hi phalsak a ni lo a ni a ti. South Africa constitution-ah chuan tu pawh thla 12 aia tam jail tang tura court-in a hrem chu parliament inthlan chuh phalsak an ni lo a ni. South Africa president, Cyril Ramaphosa chuan parliament inthlana Zuma din phalsak a nih loh chungchangah hian,"South Africa-ah hian dan kan nei a, chu kan dan chuan min phuar a ni. Dan zawm avanga buaina a awm a nih chuan, buaina tudai turin kan sipaite pawh an inring reng a ni," a ti.

Zuma hi 2018 khan president a nihna aṭanga bang tura nawr chhuah a ni a, hemi hnu hian reorel lai party, African National Congress (ANC) aṭanga chhuakin, party thar, uMkhonto we Sizwe (MK) tan campaign a nei chho leh a ni. Kum 2021-a Zuma man a nih avang khan KwaZulu-Natal-ah buaina chhuakin mi 300-in nunna an chân phah a, hei vang hian tun ṭuma ANC tana hnawksak ber tura ngaih MK party tana campaign Zuma hi parliament inthlana din phalsak a nih loh avang hian buaina nasa tak a chhuah leh mai hlauhna a tam hle a ni.