Afghanistan : Tui lian vangin mi 66-in nunna an chân

Afghanistan hmar lamah tuilian avangin mi 66 an thi a, chenna in 1,500 a chhiat bakah thlai hmun zau tak tihchhiat a ni bawk.

Afghanistan hian tunhnaiah khuarel chhiatna an tawk zing hle a, tun thla tir lam khan sabereka-khuang-kaih vangin Ghor province-ah mi 50-in nunna an chân bakah buh hmun tam tak a tichhe tel bawk. Hemi bakah hian kar liam ta aṭang khan tuilian avangin an buai leh a ni.

Faryab province, Afghanistan chhunga district hrang hrang chu kar liam ta Inrinni zan aṭang khan tuilian avang hian an buai ṭan tih Faryab governor thupuangtu Asmatullah Muradi chuan a sawi a, tuilian avang hian nunna chân an awm bakah sum tam tak an hloh phah tih a sawi bawk. Mi 66 an thih tawh bakah mi panga hliam tuar an awm mek tih sawiin, heng bakah hian an awmna chin hriat loh mi eng emaw zat an awm tih a tarlang tel bawk.

Tuilian hi mihring nunna chauhin a tuar lo tih Asmatullah Muradi chuan a sawi a, ran vulh lai tam takin an thih phah bakah chenna in 1,500 tihchhiat niin, huan acre 1,000 aia tam tuiin a chim pil tih a sawi tel bawk. Sorkar thuneitu ṭhenkhat chuan tui lenna province-ah hmasawnna ruhrel tam tak tihchhiat a nih avangin chhawmdawlna pek luh leh mi bo zawn a harsa tih an sawi a, heng avang hian nunna chân zat hi an la pun belh zel a rinawm tih an tarlang.