Gaza-ah insuatna a thleng lo : Joe Biden

US president Joe Biden chuan Israel sipaiten Hamas laka beihpui an thlakna chu insuatna a ni lo tiin, Palestinian ṭantuten Israel sipaiten insuatna kalpui anga an sawina chu a chhang let.

President Biden hian Israel a ṭan nia ngaiin tunhnaia ramchhung hmun hrang hrang a tlawh kualnaah Palestinian ṭantute aṭangin dodalna a tawk tam hle a, 'Genocide Joe' tiin an ko el hial a ni. Biden chuan Israel chu October 7, 2023-a Hamas-in Israel chhim lam an beih avangin Gaza indonaah hian a tuartu zawk an ni tiin, US chuan Israel mipuite himna chu a ngai pawimawh tih a sawi bawk.

US President chuan Hamas an beihna kawngah Israel chu an thlawp tih sawi nawnin Hamas chu hneh ngei se an tih thu leh, chutiang hlawhtlinna chang tur chuan Israel chu an pui tih a sawi tel bawk. Biden chuan Hamas mi hren zinga damlo, kum upate leh hliam tuar chhuah an nih theih nana inbiakna chu hlawhtling rih lo mah se chhuah an nih theih nan beiseina a awm tih a sawi a, heng mitangte chhuah an nih theih nan hian US chuan Israel chu theihtawp an chhuahpui dawn a ni, a ti.

International Criminal Court (ICC) prosecutor-in Israel prime minister Benjamin Netanyahu leh defense minister Yoav Gallant-te chu Gaza indonaa an pawikhawih vanga manna thupek chhuah tura ICC a ngenna chu Biden chuan a pawmpui lo tih sawiin, Gaza indona chuan tun dinhmunah inkahhai puan a mamawh ber tih a sawi nawn leh. ICC prosecutor hian Israel ram hruaitute bakah Hamas hotupa Sinwar leh an hruaitu dang pahnih manna tur thupek chhuah a ngen tel bawk a, he ngenna lut hi Israel leh Hamas chuan an duh loin an dodal tih an sawi.