France-in New Caledonia-ah sipai tirh luh belh dawn

France pacific territory, New Caledonia-a buaina chhuak chuan ziaawm lam a la pan theih loh avangin France sorkar chuan sipai eng emaw zat tirh luh belh an nih tur thu a puang. New Caledonia-ah hian France sipai 1,500 vel an awm mek a ni.

Buaina chhuak avang hian France high commission chuan France sipai 600 tirh luh belh an nih tur thu hi a puang a, New Caledonia huam chhunga boruak muanawm a awm zel theih nan sipai hi tirh luh belh an nih tur thu leh, an khawpui Naoumea-a airport pawh khar chhunzawm tur a la nih thu a puang tel bawk. Airport khar vang hian New Caledonia luh tum leh chhuahsan tum hi mi 3,200 chuang an tangkhang mek a ni.

New Caledonia hi Indopui pahnihna zawh hnu aṭanga France awpna hnuaiah a awm a, Australia chhak lama thliarkar te reuh te, mihring nuai hnih leh singsarih vel chauh chenna a ni. Ram leilung fate hi Kanak hnamte an ni a, kar liam ta khan France sorkarin an rama vote thlak thei chin tidanglam tura dan siam a tum chu Kanak hnamte hian duh loin an nuar a ni. Nawrh huaihawt a nih hnu lawk hian mipuite leh sipaite innawr buaiin, buaina a chhuah chhunzawm phah ta a ni. France sorkarin dan thar siam a tumah hian France aṭanga New Caledonia-a pem, kum 10 cheng tawhte chu vote neih phalsak a tum.

Kanak hnamte nawrhnaah hian mi parukin nunna an chân tawh a, hemi chungchangah hian French official-te chuan mipui ralthuam keng kah hlum niin an sawi ve thung. Kanak hnam zinga mi pakhat chuan, anmahni ram ngeiah hnam tlem zawk chan changa pawn lam mi leh zelin vote an nei tur chu an duh loh thu sawiin, hei hi midangin an hriatthiam loh thu leh, Kanak hnam chimralna tur a nih thu a sawi.

New Caledonia ṭhenawm ram, Australia leh New Zealand pawhin an khua leh tuite New Caledonia aṭanga hruai chhuak tur hian sipai thlawhtheihnate an tir ve tawh bawk.