Nobel Peace Prize 2020 dawng tur World Food Programme
Khawvela chawimawina ngaihhlut, Nobel Peace Prize 2020 dawng turin World Food Programme thlan a nih thu nimin khan Nobel committee chuan a puang.
Nobel committee chairwoman Berit Reiss-Andersen chuan Oslo-ah chawimawina dawngtu tur hi puangin, World Food Programme chu ram buaina hmuna muanna a awm theihna atan leh, heng hmuna awmte rilṭama an awm lohna tura theihtawp chhuahtu a ni, a ti. Ei tur tlachhama mipuite an awm lohna turin WFP chuan helicopter, sai leh camel thlengin ei tur semna atan an hmang a ni tiin, khawvela humanitarian organisation hmahruaitu dik tak a nih thu a sawi.
UN organisation, World Food Programme hi kum 1961 khan din a ni a, indona leh ram buaina hmuna mipuite mangang, ei tur neilote ṭanpui leh chhawmdawl hna a thawk ṭhin. Nikum chhung khan ram 88-ah mi maktaduai 97-te a ṭanpui a ni.
Tun ṭum hi UN agency emaw a hnuaia thawk emaw hnena Peace Prize pek a nih ṭum 12-na tur a ni.
Nobel Prize 2020 dawngtu tur hi puan kim a la ni lo deuh a, kar leh Thawhṭanniah economics lama dawngtu puan a ni ang. He chawimawina hi December 10 hian Sweden khawpui Oslo-ah sem a ni ang. Chawimawina hian gold medal, diploma leh tangka fai Swedish kronor mtd 10 (USD mtd 1.1) a keng tel.
Nobel Prize For Literature dawng tur Louise Gluck
American poet leh essayist, kum 77 mi Louise Gluck chu Ningani tlai khan Nobel Prize For Literature, 2020 dawng tura puan a ni.
'A hla phuaha tihsual nei lo khawpa a thiamna chuan mimalte hi universe-ah mawi tak leh tlawm takin kan lo awm ve a nih tih min kawhhmuh a ni,' tiin he chawimawina a dawn chhan hi Swedish Academy chuan a tarlang.
Louise hian Nobel Prize bakah hian a thu leh hla thiam vang bawkin, Pulitzer Prize, National Humanities Medal, National Book Award, National Book Critics Circle Award leh Bollingen Prize-te a lo dawng tawh a, kum 2003-2004 chhung khan 'Poet Laureate of the United States' a thlan a lo ni tawh bawk.