Khawvela Covid-19 hri kai tam ber ni a thleng leh
World Health Organization (WHO) tarlan danin, Ningani khan khawvela Covid-19 hri kai tam ber ni a thleng leh a, hri kai thar mi 3,38,779 an awm.
Ningania hri kai thar zingah hian Europe aṭangin mi 96,996 an awm a, India, Brazil leh US ai pawhin Europe-ah hri kai thar hi an pung tam leh tawh zawk a ni. Hemi ni vek hian Covid-19 vanga thi chu khawvel pumah mi 5, 514 an awm a, he hri vanga thi tawh zawng zawng hi mi maktaduai 1.05 an awm tawh a ni.
Khawvel ram hrang hrang 54-ah Covid-19 hri hi a la darh zual a, chung zingah chuan US, Brazil leh India bakah, Argentina, Canada leh Europe ram ṭhenkhatte chu an tel a ni.
Public Health England-a medical director, Dr Yvonne Doyle chuan Covid-19 hri kai vanga damdawi-ina dah luh an tam leh thu sawiin, hei vang hian an ramah chuan hri leng thawh hnihna a thleng mek niin a sawi. France ramah pawh he hri leng hian ziaawm lam a pan hlei thei lo a, tun hnai aṭang khan hri kai thar hi nikhatah mi 18,000 chuang te an awm leh tawh.
Belgium-ah pawh hri kai thar an pun belh leh zel. Ningani kha April thla hnua Germany-a hri kai tam ber ni thlen leh hmasak berna a ni bawk. Ram ang zawng chuan India chu nitina Covid-19 hri kai thar tam berna hmun a la ni. Hei vang hian kumin kum tawp lamah chuan India hian US a lehpel thei dawn nia sawi a ni bawk.
US chu Covid-19 hri kai tam berna leh he hri vanga thi tam berna a la ni reng a, US-a hri kai tawh zawng zawng hi mi 78,33,763 an tling tawh a, enkawl dam mi 50,25,193 awmin, hri thihpui hi mi 2,17,738 an awm.