Mediterranean tuipuiah Egypt thlawhtheihna a tla

France khawpui, Paris aṭanga Egypt khawpui, Cairo pana thlawk, EgyptAir Fligth MS804 chu chiin hriat loha hun eng emaw chen a awm hnuah, nimin tlai kha thlawhtheihna hi Mediterranean tuipuiah a tla tih Egypt Civil Aviation official-ten an sawi.

Flight MS804-ah hian thawktu pasarih bakah khualzin mi 56 an chuang a, security pathum an awm bawk. Mediterranean khawchhak lam, feet 37,000-a sanga a thlawh laiin Nilaini zan dar 12.45 velah biakpawh theih lohin a awm a ni.

EgyptAir chuan thlawhtheihna zawngtu tur hi tirh chhuah nghal an nih thu a sawi bawk. Thlawhtheihna biak pawh theih loha a awmna hi Egyptian air space chhunga mel 10 vela thuiah a lut tawh niin a sawi bawk.

Kumin March thla khan EgyptAir thlawhtheihna hi hijack a lo ni tawh a, Cyprus-ah hruaikawi a ni. Mahse thlawhtheihna hruaikawitu hi a hnuah thuneitute kutah inpein, a mi hrente pawh him taka chhuah an ni.

Egyptian aviation official chuan nimin tlai kha Flight MS804 hi a tla tih an hriat thu an sawi. He thil thleng vang hian Saudi Arabia rama cham mek, Egypt Civil Aviation Minister pawh an ram panin a haw nghal a ni.

Egypt sipaite chuan thlawhtheihna tla hi an zawng nghal a, Greece chuan pui turin aircraft pahnih a tir a, France Prime Minister Manuel Vallas pawhin a ṭul a nih chuan pui turin an inpeih reng tih a sawi.

Thlawhtheihna tlaa chuangte hming hi tih≠chhuah nghal an ni a, an zingah hian French 15, Egyptian 30, Britain, Belgium, Iraq, Kuwait, Saudi, Sudan, Chad, Portugal, Algeria leh Canada mi pakhat ṭheuh an chuang a ni.