Venezuela-ah eptute leh police innawr buai

Venezuela President Nicolas Maduro duh lohna lantira an ram khawpui, Caracas-a nawrh huaihawtte chu police-te nen innawr buaiin, pungkhawmte hnawhdarh nan police-ten tear gas an hman a ngai hial a ni.

Eptute hian President Maduro hi thuneihna chelh chhunzawm zel tura duh leh duh loh chungchangah mipuite vote lak an phut a ni. Mahse sorkar chuan vote lak hi buatsaih a tum loh thu a lo sawi tawh a ni.

President Maduro hian ni 60 chhung atan economy emergency a puang a, hemi chhung atan hian thuneihna sang zawk a inpe a ni. Hei hi duh lohin eptu lam hian tunkar chhungin ṭum thum zet nawrh an huaihawt tawh.

Eptu hruaitu, Henrique Capriles chuan President Maduro-an thuneihna sang zawk a inpe chu pawm lo turin mipuite a ngen. Hetihlai hian President chuan eptute hi sawiselin, budget chungchangah eptuten an duh anga thil an kalpui theih lohna turin kum tluana thuneihna sang zawk inpekah a vau let.