Donald Trump-a'n rally-a tel theih tawh inbeisei Virtual debate neih a duh lo

US President Donald Trump chuan President thlanna neih tura atana vawiina rally neih turah a tel theih tawh a inbeisei thu a sawi. 

Donald Trump hi kar liam ta khan Covid-19 a kai tih hriat chhuah a ni a, damdawiinah enkawl a nih hnuin Thawhṭanni khan White House-ah kirin, Trump chuan nimin khan test a nei leh dawn tih a sawi. 

White House physician, Sean Conley chuan Trump hi sipai hospital aṭanga a chhuah hnuah a ṭha chho zel tih sawiin, an enkawlna course pawh Ningani zing kha a zo tih a sawi. Nimin khan Trump hian Covid-19 test a nei leh dawn a, a result a ṭhat chuan zanin leh naktukah Florida leh Pennsylvania-ah campaign theih nghal a inbeisei. 

Donald Trump hian ruahman lawk anga karleha Democrats presidential candidate Joe Biden nen debate ṭum hnihna an neih leh turah tel a tum lo tih a sawi bawk. Debate buaipuitute hian Trump-a'n Covid-19 a kai avangin debate hi virtual-a buatsaih an tum a, hei hi President chuan duh loin, virtual debate neih chu hun khawhralna mai mai, debate nihphung pawh ni lo tiin a sawi a ni.