Norway-in Palestine ram hran angin a pawm

Norway prime minister, Jonas Gahr Store chuan Norway-in Palestine chu ram hran anga a pawm thu sawiin, tun buaina hi Palestine ram anga pawm a nih hma chuan a reh thei dawn lo niin a sawi.

Jonas Gahr chuan Scandinavian ramte chuan Palestine chu ram anga an pawm vek tur thu leh, Ireland chuan an hnung an rawn zui vat tur thu a sawi. Gahr chuan Palestine-in mahnia inenkawl ram ni turin chanvo a nei tih sawiin, Scandivanian ramte chuan Palestine-in chanvo leh dikna a neih zawng zawngte an thlawp tur thu a sawi a, Gaza dinhmun thlir chuan kum 10 liam ta chhung khan hmasawnna a awm miah lo a ni, a ti.

Norway-in ram anga Palestine an pawmna an puan chungchangah hian Israel chuan Norway leh Ireland-a an palaite chu a ko let nghal. Israel foreign minister, Israel Katz chuan,"Norway leh Ireland hian Palestine leh khawvel pum tan firfiaka chetna hi a hlawk a ni tih vawiin hian an entir a ni," tiin, Norway thil tihdan chuan Gaza-a Israel mi hren mekte lak letna kawngah harsatna a thlen theih thu leh, inkahhai puan pawh a tihharsat tur thute a sawi tel bawk.

Kar hmasa khan European Union (EU)-a ram ṭhenkhat chuan middle east huam chhunga remna tluantling a awm theih nan Palestine leh Israel chu ram hrang an nih a ṭul thu an lo sawi tawh a ni. Norway hi EU ram zinga mi ni lo mah se, EU ngaihdan thlawp hian Israel leh Palestine chu ram hran angin a pawm a, firfiaka chetna chu Israel leh Palestine ram pawm lo, Israel do tlattu Hamas-te thil tih chauh a nih thu a sawi bawk a ni.