Khua leh tui nihna felhlel vangin Nepal-a chanchinbu lian neitu man

Nepal-a chanchinbu lian leh darh zau ber pawl, Kantipur Daily chanchinbu chhuahtu; Kantipur Media Group (KMG) neitu, Kailash Sirohiya chu Nepal khua leh tui a nihna chungchanga thil felhlel awmah puhin police-in an man.

Sirohiya chuan Nepal khua leh tui nihna chu dan dik taka nei a nih thu sawiin, an puhna chu a pha a, eirukna kaihhnawiha home minister chungchang a chanchinbua chhuah a nih avanga a laka phuba lakna mai mai a nih thu leh, chhui zui pawh a ngam thu a sawi thung."Kantipur Daily hian chanchinbu rintlak ni chunga thudik theh darh hna hi a thawk chhunzawm zel dawn a, tun hma pawhin beih kan lo ni tawh ṭhin a, jail-ah pawh dah ka ni tawh a ni. Vawiina sorkar hian chung hun lai chuan helna an kaihhruai a ni," tiin a sawi zui bawk.

Kailash Sirohiya man a nih chungchangah hian Kantipur Daily editor, Yubaraj Ghimire chuan sorkar chu a thil tih dik lohah mawh a phur ngam a ṭul thu sawiin, federation of Nepal journalist pawhin Sirohiya man a ni chu chanchinbu mite beihna a ni tiin sorkar thil tih dan an dem thu an sawi.