Russia-in nuclear ralthuam hman dan an zir

Russia Defence Ministry chuan tactical nuclear weapon drill an kalpui tih Thawhlehni khan a puang. Hetianga an chet chhan hi tun hnaiah khawthlang ramte'n Ukraine indonaa thuk zawka inrawlh an duh tih an sawi vang a ni.

Tun hi Russia-in nuclear ralthuam hman dan an zir tih mipui hriata a puan vawi khatna a ni. Drill chhawng khatnaah chuan nuclear pai missile pahnih Kinzhal leh Iskander hman dan zir a ni. Nuclear drill hi Southern Military District-ah kalpui niin hemi huam chhungah hian Ukraine nena an inrina pawh a tel.

France president Emmanuel Macron-a'n Ukraine a sipai thawn luh belh a hreh lo tih a sawi hnuah leh, U.K. foreign secretary David Cameron-a'n Ukraine chuan British ralthuam ṭhenkhat Russia ram chhung kah nan an hawh theih thu an sawi hnuah Russia defense ministry hian tactical nuclear weapon drill hi an kalpui dawn tih an puang a ni. Russia chuan khawthlang ramte'n hetiang thu an sawi ṭhin hian Russia leh NATO inkarah boruak ṭha lo a thlen tih an tarlang bawk.