China-in Taiwan President thar inlak hran thlawpah a puh

Taiwan president thar Lai Ching-te chu President a nih hnua a thusawina hmasa berah, China awpna hnuai aṭanga zalen duhna hawi zawnga thu sawiah China chuan a puh a, a ṭul a nih chuan hma an la dawn tih an puang zui.

China hian Taiwan hi a ram chhung a nih thu sawi nawn lehin, Taiwan chungah thuneihna pumhlum an neih theihna a nih chuan sipai chakna hmanga beih mai an hnial lo tih an sawi bawk. Taiwan President thar chu inlak hran duhah puhin, Taiwan Affairs Office (TAO), Beijing chuan Lai Ching-te thusawi chuan inlak hran duhtu a nihzia a nem nghet a ni, a ti.

TAO thupuangtu, Chen Binhua chuan he thusawi hi China chuan an chhan let ngei a ngai tih sawiin, Democratic Progressive Party (DPP) hruaitute pawh zalenna an ngiat kawnga an chet dan avangin hrem an ngai tih a sawi. Chen chuan Lai thusawi avang hian Taiwan chu China ram chhung a nihna a bo lo tih a tarlang tel bawk. China foreign minister, Wang Yi pawhin Taiwan rama inlak hran duh pawlte chuan an la tuar ngei dawn tiin a vaukhan ve bawk.