UK PM-in inthlan neih hun tur a puang

United Kingdom prime minister Rishi Sunak chuan UK Parliament inthlan chu July 4, 2024-ah neih a ni dawn tih a puang. Inthlan neih a nih dawn tak avang hian UK Parliament chu May 30-ah King Charles III chuan a ṭhiat (dissolve) ang.

PM Sunak chuan ram chhung sum dinhmun siam ṭhat tumin PM hna chu chelh a ni tih sawiin, UK sum dinhmun chuan ziaawm lam a pan tih entir nan GDP ṭhan dan leh thil man pung a ṭha zawnga a inthlak dan a sawi. Sunak chuan, Cold War hnu lama khawvel boruak a ṭhat loh ber laiin an inthlang dawn tih sawiin, khawvel hmun hrang hranga buaina chhuak chu a sawi lang bawk.

Rishi Sunak chuan, opposition Labour Party-te chu bei zuiin, hmathlir mumal nei loah a puh a, "Hemi a nih avang hian an chungah rinna nghah ngam a ni lo," a ti. Sunak awmna party, Conservative hian UK-ah hian kum 14 chhung sorkarna an siam tawh a, inthlan hun tur tihchian a nih tak avang hian nimin khan Rishi Sunak leh Labour party hotu, Keir Starmer chuan campaign kick-off an nei nghal a ni.