China sipaiten Taiwan hualin indo nunchan an zir

China chuan Taiwan President thar thusawi an chhan letna pakhat atan nimin khan ni hnih awh turin a indo lawng leh indo thlawhtheihna hmangin Taiwan a hual.

Taiwan President thar Lai Ching-te chuan President a nih hnua a thusawi hmasakna berah China nena an inkar chu sawi langin, China chuan vawi tam tak tibuaiin an ram chhung luh tum mah se an ram venghim turin mipuit a sawm a; Taiwan-ah chuan mipui sorkarna (democracy) hun ropui tak a inher chhuak mek tih a sawi bawk. President thar thusawi hi China chuan a helh hle a, na taka an chhan let tur thu an lo sawi tawh a ni.

Chinese military chuan thuchhuah siamin, drill an neih mek chu Taiwan inlak hran duhte hremna a nih thu an tarlang. An indo lawng leh thlawhtheihnate chuan Taiwan thlairkar hualin, indo nunchan an zir bakah indo turin an inpeih em tih an enchhin dawn niin an sawi. China chuan Taiwan chu an ram chhung a ni tih an sawi nawn leh bawk.

Taiwan chuan China chet dan chu chhang let ve nghalin, a sipaite chu inralring tura hriattirna a tichhuak a; Defence ministry chuan an zalenna humhim an inpeih reng thu leh buaina an duh lo a, mahse, buaina a chhuak a nih chuan tawlh hnung zawk nih an tum lo tih a sawi.

Taiwan Strait-a indo nunchan zirna chu remna leh muanna atan a ṭhat loh mai bakah, China inlunlinzia a tilang niin Defence ministry chuan a tarlang. Taiwan President thupuangtu chuan, China chet dan chu a dem thu sawiin, "Buaina chawk chhuak zawnga hmalakna a ni," a ti.