Myanmar armed group vangin Rohingya hnam tlanchhiaah puh

Rohingya activist-te chuan Myanmar khawthlang lam Rakhine state-ah armed group vangin Rohingya hnam tam tak chu himna zawngin an tlanchhia niin an sawi.

Nikum November thla aṭang khan Rakhine-ah hian armed group Arakan Army (AA) leh Myanmar sipaite an inbei tawh a; chawlhkar liam ta khan AA hian he state-a khaw pawimawh tak, Buthidaung an la a ni.

Ram pawn lama Rohingya pawl hrang hrangte chuan thuchhuah inṭawm siamin, AA fighter-te'n Buthidaung khuaa cheng Rohingya-te chu khua chhuahsan tura hrilhin, an inte an halsak bakah an rawk bawk niin an tarlang a, "Rohingya-te hi AA hoin an thununna bial chhungah kaltir an ni," an ti. AA chu Rohingya-te tihluihna hmanga chhuahtir lo tur leh mihring dikna chanvo bawhchhe lo turin an chah.

Hetih lai hian, AA chuan Buthidaung an lak hnuah he khuaa chengte chu insawn chhuak tura hrilhin, hmun him lamah an insawnpui niin an sawi ve thung a, mahse, an insawntirna hmun erawh an sawi lang lo. Myanmar sipaite chu Buthidaung khua tichhia a, AA bei let tura Bengali Muslim-te chhawrah an puh a ni.