Srebrenica insuatna hriatrengna hmanna tur resolution UN-in a pawm

United Nations General Assembly chuan kum 1995-a Bosnian Serbs-te'n Bosnian Muslim-te suat tuma mi 8,000 chuang an thahna hriatrengna atana kum tin a puala ni hman rawtna resolution chu Ningani khan a pawm.

Resolution-ah hian Bosnian Muslim-te suat tuma thah an nih hriatrengna ni atan kum tin July 11 chu “International Day of Reflection and Commemoration of the 1995 Genocide in Srebrenica,” atana hman rawt a ni a, hei hi kumin aṭanga ṭan an duh thu an tarlang bawk. UN General Assembly-ah hian member 193 awmin, resolution hi member ram 84-in an thlawp laiin, ram 19 chuan a duh lo zawngin vote an thlak thung a, ram 68 erawh chuan vote an thlak lo. Member ram 22 chu assembly-ah hian an tel lo thung.

He resolution hi Bosnian Serbs ram chuan a dodal nasa hle a, president Milorad Dodik leh an ṭhenawm ram, Serbia president Aleksandar Vucic chuan resolution pass a nih hnu hian thu sawiin, Vucic chuan Srebrenica insuatnaa inhnamhnawih zawng zawngte chu mana hrem an nih tawh thu leh, resolution chu Serbia, Republika Srpska le Bosnian Serb-te thinlunga inthiam lohna tuh a, midang mit hmuha hmuh tleutir tumna mai niin a sawi.Resolution hi Germany leh Rwanda-te put luh niin, Serbian-te chu thil tisualtuah an puh hran lo a ni.

Resolution put luh hi ram 40 zetin an inṭawm a, chung ram zinga mi United States chuan resolution pass a ni chu lawmawm an tih thu an puang zui.Resolution hi pass ni mah se ram ṭhenkhat chuan an dodal ve thung a, an zingah hian Russia pawh telin, Russia palai, Vassily Nebenzia chuan resolution chu pawm loh ni se a duh thu leh, vote thlak lo chhiar tela resolution chu pawm theih a nih loh thu a sawi bawk.

July 11, 1995 khan Bosnian Serbs-te hian Srebrenica-a UN venhim hmun luhchilhin, Bosnian Muslim 8,000 zette chu an chhungte hnen aṭanga dah hrang nghalin an tihlum a ni. Tlan chhuah tuma tlanchhiate pawh um zuiin an that zui bawk. He insuatna hi UN court pahnihin a fiah hnuah pawh Serbia leh Bosnian Serbs te erawh chuan thil thleng lo tiin an pha thung.