Russia rama US thil neih hren theihna dan Putin-a'n a pawm

Russian president Vladimir Putin chuan Russia ram chhunga United States, US khua leh tui bakah US company-te thil neih hren theihna thupekah a hming a ziah hnan. Heng bungrua leh thil hlu an hrente hi khawthlang ramte'n Russia an hrekna avanga sum leh pai hlohte hnenah zángnadawmna atan pek theih a ni ang.

Khawthlang ramte hian Russia mite neih hlu, USD tluklehdingawn 300 hu vel chu 2022, February-a Russia-in Ukraine a rûn hnuah a hreksak tawh a, thla liam ta khan US ram chhunga Russia neih hlu an hreksak chu US president Joe Biden chuan Ukraine puihna atana hman turin phalna a pek theih nan US Congress chuan dan thar a siam a ni. Hemi chhan let nan hian Russia chuan an ram chhunga US mi leh sate bungrua chu hrek phalna dan a siam zui ve ta a ni.

Russian company, organisation leh mimal zingah US hrekna avanga an neih hlu chante chuan dan thar hmang hian Russia sorkar hnenah zángnadawmna an dil thei dawn a ni. He zángnadawmna hi Russia rama US mi leh sate bungraw hlu neih hmanga pek tur a ni. Khawnthlang ram sumdawng tam tak chuan Ukraine indona ṭan a nih hnuah Russia rama an sumdawnnate an tihral avangin company tam tak chuan Russia dan thar siam hi an tuar ve dawn lo a, hetih lai hian Russia ram chhunga sumdawnna la nei mekte erawh chuan an tuar viau a rinawm thung.