Japan leh SKorea-in NKorea leh Russia hrekna siam

Japan leh South Korea chuan thuchhuah hran ve ve siamin, company emaw, lawng emaw, mimal emaw pawh North Korea-in Russia hnena ralthuam a thawnnaa inhnamhnawih nia a hriatte hrekna an siam thu an puang.

Japan leh South Korea-te hian North Korea-in Russia hnena ralthuam a thawn hi Ukraine beihna tur a nih thu an tarlang. North Korea hi Russia hnena ralthuam ṭhahnem tak container hmanga thawnah puh a ni a, hei hi tun hnaia missile ṭum thum lai a enchhin nen pawh a inkungkaih niin an sawi. Japan sorkar thupuangtu, Yoshimasa Hayashi chuan ralthuam inthawn ruk chu Japan chuan an dem thu a sawi a,"Kan thawhpui United States leh ram dangte nen pawh kan sawi tawh a, North Korea-in Ukraine beih nana Russia a puihna ni ngeia hriat, group 11 leh mimal bungrua hrensak turin kan hriattir tawh a ni," a ti.

Nikum August thla khan US hian Russia chu Ukraine beih nana a ralthuam hmang zo ṭep tawh anga sawiin, a mamawh ralthuam neih nan hian North Korea puihna pawh a dil niin a tarlang tawh bawk.

South Korea pawhin Russia lawng pahnih leh North Korea lawng pasarihte hrekna a siam a, heng lawngte hi Russia leh North Korea inkara ralthuam phur ṭhin lawng nia hriat a ni. South Korea-in North Korea lawng hrekna an siamsak zingah hian Russia-a wagner group tana ralthuam phur ṭhin an awm thu leh, lawng ṭhenkhat chu Russia aṭanga NKorea-a tuialhthei phurte an awm thu an sawi a, heng tuialhthei hi NKorea chuan missile leh nuclear programme a neihte siam nan a hmang bawk a ni, a ti. Hetih lai hian North Korea chuan Russia hnenah ralthuam a pe ṭhin tih hi a pha a, khawi ram hnenah mah ralthuam pek tumna an neih ngai loh thu an sawi thung.