Taiwan hmeichhe president hmasa ber la lut

Taiwan ramin hmeichhe president a neih hmasak ber, Tsai Ing-wen chu nimin khan lak luh a ni.

Democratic Progressive Party (DPP) hruaitu, Tsai-i hi kumin January thlaa inthlanah khan hneh taka thlan tlin a ni.

Kum 1956, August 31-a piang, Tsai Ing-wen hi Taiwan hmeichhe zinga President atana thlan tlin hmasak ber a nih bakah, Hakka leh Aboriginal thlah zinga president ni thei hmasa ber a ni. President ni tawh zinga Taipei mayor la ni lo awmchhun a ni bawk.

President Tsai-i hi law graduate niin, University professor a ni ṭhin. Kum 1993 aṭang khan khatih laia roreltu, Koumintang chuan sorkara dinhmun pawimawh tak tak chelh turin a ruat chho a, President hlui Lee Tseng-hui state-to-state relation doctrine duangtu zingah pawh a tel a ni.

Kum 2004 khan DPP member-ah lutin 2008-ah party hotu atan hian thlang a ni. Mahse kum 2012-a President thlanna neihah khan a chak zawh loh avangin party hruaitu a nihna aṭangin a bang a ni. Mahse kumin January thlaa President thlanna neihah khan chuh lehin, hneh taka thlan tlin a ni ta a ni.

President thar hi Republic of China dintu, Sun Yat-sen thlalak hmaa rinawmna thu tiamtir lak luh a ni a, a rual hian vice president atan Chen Chien-jen pawh lak luh a ni bawk.