EgyptAir thlawhtheihna zawn chhunzawm zel

Mediterranean tuipuia tla nia hriat, EgyptAir thlawhtheihna chu zawn chhunzawm zel a ni.

Greece rama Karapthos thliarkar bula thlawhtheihna bo zawn hna hi Greece, Egypt, France leh UK sipaiten an thawk mek a ni.

Ningani zing khan Paris aṭanga Cairo pana thlawk, Flight MS804 hi Cairo International Airport a thlen hun tur minute 20 vel a la awm tihah biak pawh theih lohin a awm a, a hnuaah Mediterranean tuipuiah a tla tih hriat a ni. He thlawhtheihnaah hian thawktu leh khualzin 66 an chuang,.

Greece chuan radar aṭanga a landanin, Airbus A320 hi feet 25,000 chuanga sanga a thlawh laiin chesualin tupuiah hian a tla ta niin a sawi. Hetihlai hian Egypt chuan thlawhtheihna hi a khawl lam dik lo vang ni loin, firfiakte thiltih vanga chesual nia a lan thu a sawi thung.

Thlawhtheihna chesuala chuang zinga a tam zawk hi Egypt leh France mi an ni a, British mi pakhat a tel bawk.

Greek aviation official-te chuan air traffic controller-ten pilot hi Greek airspace-a a luh tirh chuan an be thei a, thil engkim pawh a pangngai vek nia a lan thu a sawi. Zing dar 2:27 vela biak an tum leh chuan a rawn chhang tawh lo a, a hnu minute hnihah radar chuan a man thei tawh lo tih an sawi.