ICJ-in Rafah-a chet lakna titawp turin Israel thu a pe

International Court of Justice (ICJ) chuan Israel chu Rafah-a chet a lakna titawp turin thu a pe a, Hamas pawh Israel mi an hren mekte chhuah turin a ti bawk.

ICJ hian Rafah beihna titawp tura thu a pek bakah Egypt aṭanga Rafah kal pawhna pawh dang lo turin Israel chu a hriattir a, chhawmdawlna phurh luh nan hei hi a pawimawh tih a tarlang a ni. Hamas mi hren mekte chungchang pawh ICJ hian sawi langin, hun rei tak hren an ni chu Court chuan pawi a tih thu sawiin, a rang thei ang bera chhuah turin a hriattir.

Israel National Security adviser, Tzachi Hanegbi chuan Rafah-ah sipai chakna an la hman loh thu sawiin, Palestinian civil mite chhiatna thlen thei zawngin Israel chuan chet lak a tum lo tih a sawi, Egypt aṭanga Rafah kalpawhna pawh Israel chuan an dang chat lo a, chhawmdawlna luh nan harsatna a awm lo a ni, a ti.

UN-a Palestine palai Riyad Mansour chuan, ICJ thupek zawm turin Israel chu a duh tih sawiin, Hamas chuan ICJ thuthlukna chu lawmawm an tih thu a sawi a, mahse, Rafah chauh ni loin Gaza pumpui tan thupek hi chhuah ni se an duh tih a sawi. UN secretary general Antonio Guterres chuan ICJ thuchhuah chu UN hnuaia ram awmte tan zawm ngei a ngai a ni tiin, Israel leh Hamas paw'n Court thupek chu an zawm a beisei tih a sawi. ICJ-in thupek a chhuah hnu hian Israel chuan Inrinni khan Rafah a bei leh a, thlawhtheihna leh laipui hmangin Gaza khawpui chhim lam hi a kap leh a ni.