Burkina Faso-a sipai rorelna kum nga chhung atan pawtsei

Africa-a Ghana chhim lam ram, Burkina Faso chuan Inrinni-a ram pum huapa sawihona an neihnaah an rama sipai rorelna chu kum nga chhung atan pawtsei turin thutlukna an siam.

An ram sorkar kal dan tura thutlukna an siamah hian remna thuthlung ziah a ni a, sipai sorkar hotu, Ibrahim Traore chuan hming ziah hnanin, Burkina Faso-a democracy inthlan awm leh hun tur chu July 2024 aṭanga chhiara thla 60 hnuah a nih thu a puang.

Inremnaah hian, "Sipaiin ro an rel hun chhung leh democracy-a inlet tura inthlan hun tur chu he inremna a tawp hma hian a remchang a nih chuan neih theih a ni ang," tiin an tarlang. Inremnaah hian Ibrahim Traore chu inthlanna neih hunah president a chuh theih tur thu tarlan a ni bawk.

Sipai rorelna titawp a, democracy-a inlehna tur tihkhawtlai a nih avang hian khawthlang rama democracy ramte'n Africa khawthlang leh ram lailia awmte a puih ṭhinna a nghawng ngeia rin a ni.

Burkina Faso-ah hian kum 2022 khan sorkar laka helna thlengin sorkar paihthlak ni a, heta ṭang hian sipaiin rorelna an chelh a ni. Sipai rorelna hnuaiah hian kumin July thlaa inthlanna nei tura ruahman a ni a, mahse, sipai sorkar hruaitute leh mipuite ṭhu khawm chuan an rama democracy sorkar din leh tura ruahmanna chu sawn hlain, July thla aṭang hian sipai sorkarin ro an rel chhunzawm ang a, hei hi kum nga chhung atana an kal dan tur niin an puang zui a ni. Burkina Faso-ah hian 2023 khan inbeihna nasa tak thlengin, hemi ṭum hian mi 8,000 chuang an thi a ni.