Papua New Guinea-a leiminin mi 670 a chhilh
Papua New Guinea hmar lama Zirtawpni liam taa leimin nasa tak thlengin mihring a chhilh zat chu mi 670 vel niin International Organisation for Migration chuan a chhut.
Leimin hi Enga province-a thleng a ni a, International Organization for Migration hotu Serhan Aktoprak chuan he chhiatna thlengin a nghawng hi a tira an lo chhut aiin a nasa hle tih a sawi, 'Tunah hian in 150 chuang chu leimin hian a chhilh nia hriat a ni,' tiin nimin khan a sawi. Lei hi a la min belh zel avangin chhanchhuah hna thawktute tan pawh a la hlauhawm hle tih a sawi bawk.
Lei minna bialah hian mi 4,000 vel an cheng a, mahse, chhanchhuah hna thawhna kawnga puitu, Care Australia chuan he hmunah hian tualchhung buaina avanga a chhehvel aṭanga tribal mi tlan lut tam tak an awm avangin leimin tuartu hi an chhut ai hian an tam zawk hle a rinawm niin a tarlang.
Papua New Guinea defence minister Billy Joseph leh National Disaster Centre director Laso Mana-te chuan nimin khan helicopter hmangin chhiatna thlenna hmun hi an pan a, chhanchhuah hna thawh mekte an enfiah ang. Aktoprak chuan chhanchhuah hna thawhna kawngah ram dangte puihna dil a nih dawn leh dawn loh chungchangah chuan Thawhlehniah sorkarin thutlukna a siam tur thu a sawi.
US leh Australia chuan chhanchhuah hna thawhna kawngah puih an inhuam thu an sawi tawh a ni.Papua New Guinea-a leiminin mi 670 a chhilh