Papua New Guinea-in leiminin a chilh mi 2,000 an chuang tih a sawi

Papua New Guinea chuan Thawhṭanni khan United Nations hnenah an rama leimin nasa tak thleng dinhmun thar ber hriattirin, leimin hian mihring 2,000 chuang a chhilh niin an tarlang.

Kar liam ta Zirtawpni khan Papua New Guinea-a Enga province awmna tlang pang chu nasa taka minin, leimin hian in tam tak a hnawl tel niin an ram national disaster centre chuan an tarlang a, leimin hian mi 2,000 chuang a chhilh mek nia an hriat thu an puang. Leimin avang hian in tam tak a chhiat bakah, huan thlai nasa takin a chhe tel bawk a, an ram ei leh bar zawnna a nghawng pha hial dawn niin disaster office chuan an tarlang. Zirtawpnia leimin a thlen tirh khan thuneitute chuan thi zat hi 100 aia an tam an rin thu an lo sawi tawh a, tun dinhmunah ruang paruk chauh an la hmu a ni.

Hetih lai hian International Organization for Migration (IOM) chuan leimin avanga thi zat hi 670 vel a nih an rin thu an puang tawh thung a, leiminin a chhilhte hi dama lak chhuah an inbeisei tawh loh thu an tarlang tel bawk.

Papua New Guinea official-te'n UN hnena leimin dinhmun an hriattirnaah hian Porgera Mine highway chu a ping niin an sawi a, tun dinhmunah lei hi a la chet reng avangin chhanchhuahna thawktu leh dam chhuakte tan pawh a la hlauhawm thei a ni, an ti. Papua New Guinea sorkar hian UN ṭanpuina dil nghalin, leimin avanga chhiatna an tawh chu a nasat em avangin sipaite bakah an ṭhenawm ramte hnen aṭangin chhanchhuah hna thawka puitu an mamawh thute an sawi tel bawk a ni.