NKorea-in satellite rocket kah chhuah a tum - Japan Coast Guard

Japan Coast Guard chuan North Korea-in June 4 hmaa an sipaite hman tur spy satellite rocket kah chhuah a tum thu leh, Japan sorkar pawh an hriattir tawh thu an sawi.

Japanese Coast Guard tarlan danin, NKorea-in satellite rocket kap chhuak tura an inbuatsaih hun chhung ni riat hi Pathianni zan khan inṭan tawhin, hei hian NKorea chhehvela ram pathumte tuipui dinhmun chu hlauhthawnawmah a dah a ni, an ti. NKorea hian satellite hi a kap chhuak a nih chuan SKorea tuipui kam lam bakah, Philippines ram thliarkar Luzon tan pawh a hlauhawm thei dawn a, hei vang hian United States, Japan leh SKorea official-te chuan NKorea hotu, Kim Jong Un chu an thil tum ṭhulh tura ngen turin an inthurual nghal a ni. NKorea hian spy satellite kah chhuah nan hian ballistic missile hman a tum a, hei hi UN resolution bawhchhiatna a nih thu Japan new agency-te chuan an tarlang.

Satellite rocket kap chhuak tura NKorea a inbuatsaihna hi Tongchang-ri county-ah hmuh a ni a, hei hi an ram hmun fianrial, Sohae Satellite Launching ground-a awm niin, helai hmun aṭang hian NKorea hian nikum khan satellite pathum a lo kap chhuak tawh bawk a ni. NKorea hian satellite hi hlawhtling taka a kap chhuak a nih chuan an ramin theihna a neihte a pung sawt dawn a, an hmelma leh ṭhenawm ram, SKorea dinhmun thlithlai reng nan a pawimawh dawn bakah indo a ṭul hun pawha dinhmun ṭha zawka an din theihna tur kawng a siam thei dawn a ni.