Bangladesh ram sah thlaka Kristian ram din tumna a awm : Bangladesh PM

Bangladesh prime minister Sheikh Hasina chuan Bangladesh ram hungna ṭhenkhat leh Myanmar ram ṭhenkhat sah thlaka, East Timor zul zuia Kristian ram din tumna a awm tih a sawi.

Bangladesh-a rorel lai, Awami League hotu Hasina chuan Bangladesh (Chattogram) leh Myanmar ram ṭhenkhat chhunfinin, chhim lamah Bay of Bengal thlenga inzarpharh thlain ram thar din tuma hma la an awm tih a sawi a, hetianga remna leh muanna an neih tibuai zawnga chet lakna awm chu an dodal zel dawn tih a sawi bawk.

Sheik Hasina chuan Bangladesh ram chhungah ram dang tan air base siam a phalsak chuan January-a inthlan an neihah khan hnehna awlsam taka a chan theih nana puih inhuam an awm tih sawiin, mingo hnen aṭanga he sawmna hi dawng a nih thu a sawi bawk. Hasina chuan an ram chhim lama thliarkar pakhat, St. Martin Island chu US-in an hmanrua bun nan an thlithlai niin a sawi bawk a, mahse, US chuan an pha thung.