Israel-in Rafah-a airstrike a neihah Palestinian 45 an thi; PM Netanyahu-a'n tihsual palh a nih thu a sawi

Israel sipaite'n Thawhṭannia Rafah khawpuia airstrike an neihah Palestinian mi tlanchhiate awmna, tent camp a fuh tel a, mi 45 an thi niin tualchhung official-te chuan an sawi. He thil thleng avang hian Israel chuan ram dangte sawisel a tawk zui nasa hle.

Israel prime minister Benjamin Netanyahu chuan Thawhṭannia an sipaite thiltih chu tihsual palh a ni tih a sawi a, an chhui chiang mek tih a sawi bawk. "Civil mite tawrhna thlen lo turin theihtawp kan chhuah reng chungin, tihsual palh a thleng a ni," tiin Parliament-ah a sawi.

Gaza Health Ministry leh Palestinian Red Crescent chuan Israel airstrike-a thi hi mi 45 niin, an zingah hian hmeichhia 12, leh naupang pariat an tel tih an sawi. Ruang pathum chu tu nge an nih tih hriat theih loh khawpa an kan chhiat thu an tarlang bawk.

Israel sipai hotute chuan Rafah-a airstrike neih chungchang hi an chhui chian mek thu leh, civil mi nunna chân an awm chu pawi an tih thu an sawi. Military Advocate General Maj. Gen. Yifat Tomer-Yerushalmi chuan indona nasatna hmunah chuan hetiang tihpalh thil hi thleng a awm leh ṭhin niin a tarlang.

Ram hrang hrangin Israel an dem

Rafah-a Israel airstrike neih chungchang hi ram hrang hrangte'n an dem thu an sawi nghal.

France president Emmanuel Macron chuan, "Beihpui thlakna hi tihtawp a ni tawh tur a ni. Rafah-ah Palestinian civil mite tan hmun him a awm lo. International law zahna lantir a, inkahhai puang thuai turin ka phût a ni," a ti.

Italy defence minister Guido Crostto pawhin hetianga bomb thlak hi inhuatna tipunlun zualtu, an fate leh tute thlenga nghawng thei thil a ni, a ti bawk.

Egypt leh Jordan pawhin Rafah beih a ni chu an dem thu sawiin, Egypt Foreign Ministry chuan international law bawhchhiatna lian tak a ni a ti a, Jordan Foreign Ministry chuan Israel chet dan chu 'war crime' tiin a sawi.

US chuan Israel chu civil mite tawrhna thlen lo tura fimkhur zual turin a chah a, mahse, Rafah-a beihpui a thlak titawp tur erawh chuan a ti lo thung. National Security Council thupuangtu chuan,"Israel hian Hamas-te um zui tur hian dikna a nei a, beihpui a thlaknaah hian Israel civil mite beihnaa mawhphurtu zinga mi, Hamas senior pahnih an thi tih pawh kan hria a ni," a ti.