North Korea spy satellite kah chhuah a puak

North Korea-in Thawhṭannia spy satellite a kah chhuah pahnihna chu kah chhuah a nih hnu rei lote, boruaka a awm laiin a puak. Korean Central News agency chuan satellite kah chhuah thu hi puangin, engine lam fel loh avangin kah chhuah a nih hnuah a puak zui niin an tarlang.

North Korea hian Japan coast guard hnenah satellite rocket kah chhuah a tum thu hi a hriattir tawh a, hei vang hian Japan sorkar chuan a chhehvel ram tuipuia awmte tan a hlauhawm thu a lo sawi tawh a ni. North Korea hian satellite hi Thawhṭanni khan a kap chhuak lui tho a, mahse, kah chhuah a nih hnu rei loteah satellite hi a puak ta a ni.

North Korea-in satellite rocket a kah chhuah avang hian a ṭhenawm ram - South Korea, China leh Japan-te chuan meeting an nei nghal a ni. Japan defence minister, Minuro Kihara chuan North Korea satellite kah chhuah chu khawvel pum tan thil hlauhawm a ni tiin, South Korea unification ministry chuan khawvel leh an chhehvel ramte dinhmun hlauhawma dahtu a nih thu a sawi ve bawk. Japan, South Korea leh China te hian North Korea-in satellite rocket a kah chhuah demna thuchhuah hi an siam zui bawk.

United Nations (UN) chuan North Korea hi van sang lama eng chi mah kap chhuak lo turin a khap tawh a, mahse, North Korea erawh chuan satellite kap chhuak tura thuneihna a neih thu sawiin, missile pawh vawi eng emaw zat a en chhin tawh thung.

North Korea-in satellite a kah chhuah hlawhchham hi an ram hruaitu Kim Jong Un-a'n kum 2024-a sipaite hman tur spy satellite pali neih belh tura ruahmanna a siam hlawhchhamna a ni. Nikum November thla khan spy satellite hi pakhat hlawhtling takin a lo kap chhuak tawh a ni.