Spain PM-in Palestine ram an pawm thu puang

Spain prime minister Pedro Sanchez chuan Thawhlehni khan Spanish cabinet ṭhu khawmin Palestine ram a pawm thu a puang.

Pedro Sanchez hian Thawhlehni zing khan Spain mipui hmaah TV kaltlanga thu sawiin,"Spanish parliament-in hetiang thutlukna a siam hi thil pakhat a hlawhtlin theih nan a ni a, chu chu Israel leh Palestine-in remna an neih theih nan a ni," a ti. Sanchez chuan Spain-in Palestine ram a pawm chu tu dodal a tumna mah a nih loh thu sawiin, Israel a dodal bikna pawh a nih loh thu a sawi bawk. "Israel mipuite hi kan zah a, mi ṭha tak an ni. Israel mite hi ṭhian ṭha tak an ni a, anni nena inlaichinna ṭha tak neih hi kan duh," tiin, Gaza-ah inkahhai puan a duh thu a sawi lang. Gaza-a ṭanpuina thawn luh belh a duh thu sawiin, Hamas-in Israel mi an hrente pawh chhuah ni se a duh thu a sawi bawk a, Palestinian National Authority thuneihna hnuaia Palestine ram din a, East Jerusalem lama West Bank leh Gaza kaltlanga luhka leh chhuahka awm se a duh tih a tarlang a ni.

Spain bakah hian Norway chuan Palestine ram a pawm thu hi a puang tawh a, Ireland pawhin Palestine ram an pawmna hi an la puang ve leh dawn bawk. Hei vang hian Israel leh khawthlang ram intel khawm, European Union (EU) inkar a chhiat belh zel a, Israel foreign minister, Israel Katz chuan Jerusalem-a Spain consulate chu Palestinian ṭanpui an phal loh tur thu a puang zui ve bawk.