Hong Kong security law hmangin mi 6 man

Hong Kong police-te chuan nimin khan an ram security law thar hmangin, online-a inlak hran duhna lam hawi post avangin mi paruk an man.

Police-in an mante hi hmeichhia panga leh mipa pakhat niin, kum 37-65 inkar an ni. An man zinga pakhat hi Tai Lam Centre-a hren lai a ni bawk.

Thuchhuah an siamah, police-te chuan an mi mante hian an hming thupin kumin April thla aṭang khan social media page-ah sorkar laka helna lam hawi zawnga thu an post ṭhin thu an sawi. An thu post-te hi Central Government (China), HKSAR Government leh Judiaciary laka heltir tuma mipuite fuihna niin, hei bakah mipuite chu dan phal loh nawrh huaihawtnaa tel turtein an fuih bawk a ni, an ti. Mi parukte hi safeguarding National Security Ordinance-a section 24-na bawhchhiaah an puh.

Kumin March thla khan Hong Kong hian security law thar, Article 23 tia sawi hi a hmang ṭan a, mi parukte hi he dan thar hnuaia man hmasak ber a ni. Article 23 hnuaiah hian category panga - ram phatsan, hel, ram dang tana enthlak hna thawk, ram inrelbawkna tichhe zawnga che leh ram dang inrawlh nia puhte hmangin dam chhung tang tura hrem theihna dan siam a ni. Hrem theih zingah hian China-a rorel lai, Communist Party hruaitu huatna lantir tura midangte fuihtua puhte pawh huam teltir an ni bawk a ni.