Rafah-a Israel chet danin US red line a pel lo : White House

Israel-in Gaza Strip chhim lama Rafah khawpui a beih dan chuan US red line a pel lo tih US sorkar chuan a sawi. Pathiannia civil mite awmna, tent camp an bomb chungchang chhuina pawh uluk taka an enpui thu a sawi bawk.

Rafah khawpui laili laia hmun pawimawh tak, al-Awda mosque bulah Israel tank hmuh an nih thu sawi a nih hnuah, US national security council thupuangtu, John Kirby chuan he thu hi a sawi a, US chuan Palestinian civil mite harsatna leh manganna pawh a hriatpui reng a ni, tiin a sawi.

Pathiannia refugee tent kah a nih chungchang pawh sawi chhuakin, Kirby chuan,"Israel chuan kha thil thleng kha tihsual palh a nih thu pawh a sawi tawh a ni," a ti. Rafah-a Israel chet dan avangin US-in Israel sipaite a puihna ṭhin a hnuhdawh belh dawn em tih zawhna chu,"Israel-in Rafah-a Hamas-te a um zuinaah chhiatna rapthlak lutuk leh, civil mi tam tak thihna thlen zawnga che lo tura kan duh thu kan sawi tawh. Chutiang ang taka a chetna chu kan la hmu lo," tiin Kirby chuan a chhang. Israel sipaite'n beihpui an thlakna chu khawpui dai lamah hlir a ni, a ti. Rafah khawpui chhunga Israel tank hmuhte pawh sipai rual nena vawi khata tam taka lut an ni lo, tiin a sawi bawk.

Hetih lai hian Israel-in refugee camp beihna atana a bomb hman chu US siam nia sawi a ni. Bomb them an hmuh chu US-a design leh siam chhuah, GBU-39 niin an tarlang. American official-te chuan hetiang bomb hman hian civil mi thihna thleng tam lutuk tur pawh a ven theih deuh nia sawiin, Israel pawh hi he bomb hi hmang uar zawk turin an hrilh niin The New York Times chuan a tarlang.