Thailand PM hlui chungthu ngaihtuah dawn

Thailand Prime Minister hlui, Thaksin Shinawatra chu kum 15 zet ram pawn lama a tlanchhiat hnuah nikum khan an ram lamah let lehin, lal chhungkua a sawi chhiatna thubuaiah thla thar hian a chungthu ngaihtuah a ni dawn.

Thailand attorney general thupuangtu, Prayuth Pecharakun chuan Thaksin hi June 18-ah court-a inlan tura hriattir a nih thu leh, Thailand-a lese-majeste dan hnuaia a thubuai chu ngaihtuah a nih tur thu a puang a ni. Thaksin hi lal chhungkaw sawi chhiatna thubuai bakah computer crime act hnuaiah thubuai siamsak a ni bawk. Hetih lai hian Thaksin-a ukil, Winyat Chatmontree erawh chuan an puhna hi Thaksin chuan a beih let tur thu a sawi a,"Thaksin hian thiam lohna a nei lo tih hi he rorelna kalphungah hian a finfiah dawn a ni," a ti.

Thaksin hi kum 2001 khan Thailand Prime Minister atan thlan tlin a ni a, a policy leh hmalakna dodaltu an awm avangin kum nga hnuah sipai helna hmanga paihthlak a ni. Nikum August thla khan a fanu kaihhruai, Pheu Thai party chuan party dang nena ṭangruala sorkarna an siam avangin Thailand-ah hian a lo let a ni.

Thailand lal chhungkaw sawisel leh sawi chhiat khapna, Lese-majeste hi khawvela dan khirh ber pawl nia sawi a ni a, he dan hmang hian mi 270 chuang man an ni tawh a ni. He dan hian 2020 chho aṭang khan hman a hlawh zual a, he dan hmanga thubuai siamsakin thiam a chang a nih loh chuan kum 15 lung in tan theih a ni. Hei bakah hian Move Forward party chuan constitutional court-a lese-majeste dan siam ṭhat duhna avangin court hian an lakah action a la tawh a, tun dinhmunah an party chu ṭhiah a ngaih dawn leh dawn loh an la ngaihtuah mek a ni.