Russia-in mi hausa leh company-te chhiah tipung dawn

Russia sorkar chuan Ukraine a run meknaah sum leh pai lama harsatna a tawh avangin mi hausa leh sumdawng company liante chhiah pek zat chu tihpun a nih tur thu a puang.

Russia sorkar hian February 2022 aṭanga Ukraine a run hnuah a sum hman a pung nasa hle a, indo nana sum a hman nen; ram inrelbawlna atana a sum hman zawng zawng hi dollar vaibelchhe za chuang fein a pung tawh a ni. Hei vang hian ministry of finance chuan Thawhlehni khan an rama mi hausa zual leh sum la lut tam deuh, sumdawng lian tak takte chhiah pek ṭhin chu tihpun a rawt a, chhiah tihpunna aṭang hian kum khatah USD vaibelchhe 29 an lak luh belh theih an ring.

Finance minister Anton Siluanov chuan chhiah tihpun chu chhiah pek dan phung inang tlang leh inbuk tawk zawk siam a tumna a ni tiin, chhiah pung aṭanga sum lo luh belh chuan Russia sum leh pai dinhmun pawh a siam ṭhat tur thu a sawi. Ruahmanna thar hi Finance Minister chuan 2025 aṭanga hman ṭan tur a nih thu a sawi bawk.

Tun dinhmunah Russia mite hian chhiah hi 13% an pe a, sum la lut tam zual mi tlemtein 15% an pe thung. Hemi dungzui hian Minister chuan kum khata USD sing ruk hnuai lam la lut tan 15% chhiah an pe tawh dawn nia sawiin, chutiang zel chuan kum khat hlawh a zirin 18%, 20% leh 22% tein chhiah pek a ngai tawh dawn a ni, a ti.

Russia sorkarin chhiah lak a tihpun chungchangah hian president Vladimir Putin chuan, a term ngana atana President-a thlan a nih hma lawk khan mi hausa leh company liante chhiah pek zat chu tihpun a ṭul thu a lo sawi tawh bawk a ni. Putin chuan Ukraine an runna avanga sum an sen tam thu leh, Europe ram tam takin Russia an hrek avanga sum leh paia an harsatna sutkian thuai a tum thute a sawi.