US beihpui thlaknaah Taliban hotu a thi
US official-te chuan kar kalta Inrinni-a Pakistan-Afghanistan ramri bula, Ahmad khuaa US sipaiten beihpui an thlaknaah Pakistan Taliban hruaitu Mullah Mansour chu a thi niin an sawi.
Official-te hian beihpui thlaknaah hian Mansour hi an bitum ber a ni tih sawiin, a motor-a chuang ve midang pakhat pawh a thi tel niin an tarlang. Mahse hemi chungchang hi official-a tihchhuah a ni lo.
US Special Operation force-te chuan Pakistan-Afghanistan ramri-ah hian unmanned aircraft hmangin Taliban-te lakah hian beihpui an thlak a, hemi tur hian President Barack Obama pawhin phalna a pe niin official-te chuan an sawi.
Pentagon pawhin beihpui thlak a nih thu hi a nemnghet a, mahse Mansour thah a nih leh nih loh erawh a tarlang tello.
Pentagon Press Secretary Peter Cook chuan thuchhuah siamin, "Mansour hi Taliban hotu a nia, Kabul leh Afghanistan ram chhung hmun danga pawikhawihna thlenna turin ruahmanna a siam nasa hle a ni. Afghan civil mite leh security force-te dinhmun derthawng takah a dah a, an ni bakah ṭangrual sipaite thlengin an dinhmun a derthawn phah a ni" a ti. Mansour chu Afghanistan sorkar leh Taliban helpawlten remna siam tuma an hmalakna kawng daltu lian tak niin a sawi bawk.
Mullah Monsour hi Taliban pawl dintu, Mullah Omar nen pawha inpawh ṭha tak an ni a, kum 2013-a Omar thah a nih hnuah an pawl hotu nihna hi a chelh a ni. Kum 1960-ah Kandahar province-ah a piang a, Taliban-ten Afghanistan-a ro an rel lai khan civil aviation minister a ni. UN chuan ruihhlo tawlhrukna lamah pawh a inrawlh nasa hle niin a sawi.