Vietnam parliament an inthlang

Vietnam parliament inthlan chu nimin khan neih a ni a, vote nei mi maktaduai 69 chuang an awm. Zing dar 7 aṭangin polling station 91,476 ah vote hi thlak ṭanin, zan dar 7 thleng hawn a ni.

Mipuite hian parliament, National Assembly (NA) 14-na member thar tur an thlan rual hian 2016-2021 atana all-level People's Councils member turte an thlang nghal bawk a ni.

NA member, deputies 500 thlan chhuah turah hian candidate 870 an awm a, an zingah hmeichhe candidate 339 an tel. Communist Party of Vietnam (CPV) member ni lo candidate 97 an awm a, candidate zinga 168 hi parliament member nilai an ni.

Provincial People's Councils atan candidate 6,528 awmin, heng aṭang hian deputies 3,918 thlanchhuah a ni ang. District level council member thlanna turah candidate 41,777 awmin, member atan mi 24,993 thlanchhuah an ni ang.

National Election Council (NEC) chuan 14th NA inthlan result hi vote thlak ni aṭanga ni 20 chhungin puan a ni dawn tih a sawi a, NA thar hnuaia session hmasa ber chu July thla hian neih niin, NA Standing Committee leh state leader turte thlan an ni dawn a ni.