Iraq sipaiten Falluja lak let tumin bei

Iraq Prime Minister Haider al-Abadi chuan Islamic State (IS) fir≠fiakte kut aṭangin Falluja khua lak let tumin sipaite beihpui thlak tir ṭan an ni tih a puang.

Abadi chuan Falluja khua chu an la let thuai dawn tih sawiin, firfiakte chuan tlanchhiat mai loh chu thlan tur dang an nei lo a ni, a ti. Falluja khuaah chuan Iraq flag zar a ni leh thuai dawn a ni, a ti.

Sipaite chuan khawchhunga cheng civil mite chu insaseng turin an hriattir lawk. Civil mi, tlanchhuak ve lote chu an inah flag var zar turin an hriattir bawk.

Kum 2014 khan IS hian Falluja khua hi an la a, tun thlengin Iraq rama firfiak pawlte inkhuarna hmunpui zingah a la tel a ni.

Iraq sipai, police leh volunteer fighter-te chuan Baghdad khawthlang lam, km 65 vela hlaa awm, Falluja khua hi an hual tawh a ni. Baghdad-a news wesbite Shafaq chuan security force hi 20,000 vel tirh an ni tih a tarlang.

Falluja khuaah hian civil mi 60,000-90,000 vel an la awm niin BBC Middle East correspon≠dent, Jim Muir chuan a sawi. An zinga tam tak hi IS fighter chhungte an ni. United Nations leh Human Rights Watch chuan thla hmasa khan Falluja-a civil mi awmte dinhmun chu a ṭha tawh lo hle a, ei leh in tur pawh an tlachham ṭan tawh niin an lo sawi tawh a ni.

Iraq-a US ambassador hlui, Christopher Hill chuan Falluja khua la let tur chuan hun a ngaih rei a rin thu a sawi a, Iraq sorkar chu fimkhur taka a chet a ngaih thu leh, a tawpa chuan hlawhtlinna a chan ngei a rin thu a sawi.

Pathianni khan Falluja khua aṭanga tlanchhuah tum, civil mi chhungkaw 20 zinga a zahve vel chu firfiakte hian kawng lakah an lo dang a, ṭhenkhat chu kawnga bomb an tihpuahah an thi bawk nia sawi a ni. Firfiakte hian khawchhunga chengte chu khawdaiah insawn an phalsak a, mahse Falluja khua erawh an chhuahsan an phalsak lo.

"City of Minarets and Mother of Mosques" tia sawi ṭhin, Falluja khua hi kum 2004-a US sipaiten al-Qaida firfiakte laka beihpui an thlaknaah a lo chhe nasa tawh hle bawk a ni.