Turkey PM thar atan Yildrim nominate

Turkey Prime Minister thar atan President Recep Tayyip Erdogan-a thlawptu nghet tak, Binali Yildirim chu rawt a ni.

Pathianni-a rorellai, Justice and Development Party (AKP) congress neihah Transport minister nilai Binali Yildirim hi party hruai≠tu atan ruat a ni. Rorellai party hruaitu a nih tak avangin sorkar thar siam tura sawm a ni ta a ni.

Prime Minister hlui Ahmed Davutoglu chu President Erdogan nen inrem lohna an neih avangin PM a nihna aṭangin a bang a ni.

Kum 60 mi, Yildirim hian party congress-ah hian President Erdogan-a ruahmanna siamte tipuitling tura theihtawp a chhuah tur thu a sawi. Congress-ah hian Yildirim hi party hotu chuhtu awmchhun a ni a, palai 1,470 awm aṭangin 1,405 a hmu a ni.

Party hruaitu leh PM nominate atana thlan tlin a nih hnuah thu sawiin, Yildirim chuan an ram chu president rorelna hnuaia awm
ṭha a tih thu leh, ram danpui pawh siamthar a ngaih thu a sawi. Hei hi President leh prime minister-ten thuneihna inchuha an buaina tihfel theihna tur a ni a ti. A kaihhruaina hnuaia an kawng zawh tur chu Recep Tayyip Erdogan-a duhdan nen a in ang tih a sawi nghal bawk.

Erdogan hi kum 2003 khan prime minister niin, 2014-ah president a ni thung. Kum 2019-a president thlanna neih turah dawn a, hnehna a chang leh a nih chuan kum 2024 thleng thuneihna a chang thei dawn a ni. Yildirim hi kum 15 dawn transport minister a ni tawh a, President Erdogan-a road and rail infrastructure project tihpuitlinna tura hma la tu ber a ni.