Myanmar-ah Kum upa zawkte vote thlak hma phalsak

Myanmar-a Union Election Commisison (UEC) chuan November 8-a an ram inthlanpui neih tur atan, kum 60 chung lam chinte chu an awmna ward leh khuaah a hmaa vote an lo thlak lawk a phalsak. 

Inrinni zana thuchhuah a siamah, UEC chuan kum upa zawkten vote an thlak hma theihna turin ward/ village-tract election sub-commission-te a thawhpui tur thu a sawi.  

Ward/village-tract election sub-commission hian kum upa zawk, vote thlak duh si, mahse an hriselna ṭhat tawk loh vanga polling station kal thei lote tan pawh ruahmanna a siam tur a ni, tiin UEC chuan a tarlang. 

Yangon region election sub-commission secretary Tin Maung Aye chuan, "Ram chhunga Covid-19 hri leng mek avangin kum upa zawkte chu vote thlak tura mipui punkhawmna hmuna an chhuah a ṭha lo a, hei vang kum 60 chung lamte chu October 29 aṭanga November 5  inkarah vote an lo thlak lawk phalsak an ni dawn a ni," a ti. Yangon bial bikah pawh kum 60 leh a chung lam voter hi 8,00,000 chuang an awm niin a sawi. 

Myanmar ram inthlanpui hi November 8 hian neih a ni dawn a, rorellai National League for Democracy sorkar term chu nakkum March thlaah a tawp dawn a ni.